2004-05

8. júní
Skólanum færð höfðingleg gjöf

Þriðjudaginn 7. júní síðastliðinn var skólanum færð höfðingleg gjöf frá Ágústu Óskarsdóttur og Pétri Pálssyni.  Tilefnið var að yngsta barn þeirra útskrifast úr skólanum þetta vorið, því fannst þeim kjörið að sýna skólanum þann þakklætisvott „að hafa aðstoðað við að koma börnunum þeirra manns“.  Gjöfin var svo sannarlega rausnarleg því þau færðu skólanum 400.000 kr eða 100.000 kr fyrir hvert þeirra barna sem þau hafa átt hér í skólanum.  Gunnlaugur Dan skólastjóri tók við gjöfinni og notaði tækifærið til að þakka kærlega fyrir og sagði að hún muni án efa koma að góðum notum í skólastarfinu. Auk þess sagði hann frá því fyrir „þó nokkrum“ árum síðan kom móðir hans með gjöf til skólans er hennar börn höfði lokið skólagöngu hér við Grunnskólann.  Skólinn vill koma á framfæri sérstöku þakklæti til þeirra Péturs og Ágústu fyrir þann hlýhug sem þau hafa sýnt skólanum.  Fleiri myndir eru á myndasíðu

Dagana 2. - 13. maí 2005 fór fram fræðslu- og hvatningarverkefni Íþrótta- og Ólympíusambands Íslands (ÍSÍ), Ísland á iði  þriðja árið í röð. ,,Hjólað í vinnuna" nefnist átakið og er liður í að hvetja fólk til að geyma bílinn heima þegar haldið er til vinnu dag hvern, þ.e. að nota sem mest eigið afl til að komast á milli staða.
Samstarfsaðilar verkefnisins voru: Ólympíufjölskyldan, Rás 2,  Strætó BS, Húsasmiðjan, Lýðheilsustöð, Landssamtök hjólreiðamanna (LHM), Hjólreiðafélag Reykjavíkur (HFR), Íslenski Fjallahjólaklúbburin (ÍFHK) og Hjólreiðanefnd ÍSÍ. 
Grunnskóli Grindavíkur tók nú þátt í fyrsta skipti og af föstu starfsfólk sem taldist vera 54 þetta tímabil tóku 48 starfsmenn þátt í átakinu.
Í flokki fyrirtækja og stofnana með 30 - 69 starfsmenn lentum við í 1. sæti

Þessi glæsilega þátttaka og árangur hvetur okkur auðvitað til dáða og sýnir svo ekki verður um villst hverskonar kappa vinnustaðurinn hefur á að skipa. Ekkert annað fyrirtæki né stofnun héðan úr Grindavík tók þátt að við best vitum og skorum við á aðra vinnustaði að taka þátt að ári svo við Grindavíkingar vermum ekki aftur13. sæti yfir sveitarfélögin eins og í ár.

Grindavíkurdeild Rauða kross Íslands færði nýverið öllum nemendum í 1. bekk reiðhjólahjálma að gjöf. Framtak þetta er árvisst af hálfu deildarinnar og miðar að því að auka öryggi nemenda í umferðinni. Það var Guðfinna Bogadóttir formaður deildarinnar sem afhenti hjálmana. Þetta er svo sannarlega frábært framtak og á Rauði Krossinn bestu þakkir skilið.  Smelltu á myndirnar hér fyrir neðan til að stækka þær.

25. maí
3. bekkur F í fjöruferð

Bekkjarfulltrúar 3. bekkjar F skipulögðu fjöruferð fimmtudaginn 12. maí. Labbað var niður í Bót og þau komu með hollt og gott nesti með sér.
Krakkarnir skemmtu sér konunglega og fundu mikið af skeljum, kröbbum og alls kyns dóti. Krakkarnir höfðu orð á því að þetta hefði verið mjög skemmtileg ferð. Fleiri myndir eru á myndasíðu skólans.

Fyrir skömmu færði Hrafnhildur Björgvinsdóttir skólanum fjárupphæð að gjöf. Gjöfin sem gefin var í minningu um Hafliða Ottósson, var afrakstur af starfi félagsmiðstöðvar, er bar nafnið Laufin og Spaðarnir, en nú er aflögð. Óskað var eftir því að upphæðinni væri varið til forvarnarstarfs með því að efla félagsstarf í skólanum. Fleiri myndir eru á myndasíðu skólans.

Á sumardaginn fyrsta þann 21. apríl síðastliðinn var, samkvæmt venju, þreytt víðavangshlaup Grunnskólans og Foreldrafélagsins. Mikill fjöldi tók þátt í hlaupinu sem var aldurs- og kynjaskipt. Nemendur ásamt foreldrum nutu dagsins í frábæru veðri með sól og hlýju. Allir þátttakendur fengu verðlaunapening fyrir þátttökuna. Nemendur 3. K voru með hæsta mætingarhlutfallið eða 94%. Þar með hlaut bekkurinn „Mætingabikarinn“ og mun bekkurinn varðveita hann í eitt ár. Í öðru sæti, rétt á eftir varð 5.F með 83%, í þriðja til fimmta sæti varð 10.P, 10.KM og 4.S með 82%.  Myndir frá hlaupinu eru á myndasíðu skólans

11.apríl
Ásta Katrín sigraði í Stóru-upplestrarkeppninni

Miðvikudaginn 13. apríl síðastliðinn var lokakeppni Stóru– upplestrarkeppninnar haldin í hátíðarsal skólans. Keppnin sjálf hófst á degi íslenskrar tungu, 16. nóvember, fæðingardegi Jónasar Hallgrímssonar. Stefanía Ólafsdóttir stjórnaði keppninni af mikilli röggsemi. 12 nemendur úr 7. bekkjum kepptu til úrslita eftir undankeppni þar sem 53 nemendur höfðu tekið þátt.
Keppnin fór þannig fram að í fyrstu umferð lásu keppendur hluta úr verkum Guðrúnar Helgadóttur og í annarri umferð voru lesin ljóð eftir Jóhannes úr Kötlum. Að lokum lásu keppendur sjálfvalið ljóð. 
Lesarar á lokahátíð voru: Arna Guðmundsdóttir, Ester Nguyen Halldórsdóttir, Guðmundur Egill Bergsteinsson, Sverrir Karl Björnsson, Telma Rut Gylfadóttir og Ægir Þorsteinsson úr 7.G og Ásta Katrín Gestsdóttir, Hjalti Magnússon, Jóhanna Ásta Þórarinsdóttir, Jón Gunnar Kristjánsson, Kolka Hjaltadóttir og Valþór Óli Vilhelmsson
Dómnefnd mat lesturinn og eftir fundahöld var tilkynnt um úrslit sem urðu á þann veg að 1. verðlaun hlaut Ásta Katrín Gestsdóttir, Sverrir Karl Björnsson 2. verðlaun og Kolka Hjaltadóttir hlaut 3. verðlaun.
Þess má geta að Ásta Katrín lék á píanó, Sólveig úr 9.E á þverflautu, Kolka Hjlatadóttir og Jóhanna Ásta á tompet.  Mary Jean Lerry Sicat las upp á sínu móðurmáli, filippísku.
Dómnefndina skipuðu þær Ingibjörg Einarsdóttir formaður, Guðríður Óskarsdóttir, Svava Agnarsdóttir og María Eir Magnúsdóttir.
Verðlaunin voru ekki af verri endanum því Sparisjóðurinn í Grindavík gaf þrenn verðlaun, 15 þús. fyrir fyrsta sætið, 10 þúsund fyrir annað sætið og 5 þúsund fyrir fyrsta sætið. Auk þess gaf Edda miðlun bókaverðlaun, og skólinn gaf öllum keppendum sem komust í úrslit blóm. Glæsileg keppni sem var öllum til sóma.  Hér eru myndir frá lokakeppninni.
Fleiri myndir eru hér á vefsíðu skólans

11.apríl
Stóra upplestrarkeppnin -úrslitakeppnin

Nemendur 7. bekkja Grunnskóla Grindavíkur taka þátt í Stóru upplestrarkeppninni 6. árið í röð. Að þessu sinni fer lokakeppnin fram á sal skólans miðvikudaginn 13.apríl kl. 17:00.

Lesið verður úr verkum Guðrúnar Helgadóttur og Jóhannesar úr Kötlum auk valinna ljóða. 

Lesarar á lokahátíð eru: Arna Guðmundsdóttir, Ester Nguyen Halldórsdóttir, Guðmundur Egill Bergsteinsson, Sverrir Karl Björnsson, Telma Rut Gylfadóttir og Ægir Þorsteinsson úr 7.G og Ásta Katrín Gestsdóttir, Hjalti Magnússon, Jóhanna Ásta Þórarinsdóttir, Jón Gunnar Kristjánsson, Kolka Hjaltadóttir og Valþór Óli Vilhelmsson 7.V.

Dómnefnd mun að því loknu velja 3 bestu upplesarana og veita verðlaun.
Auk þess koma fram ungir hljóðfæraleikarar og Mary Jean Lerry Sicat mun lesa upp á sínu móðurmáli.

Veitingar verða í boði Mjólkursamsölunnar og skólans.

30.mars
Undankeppni Stóru -upplestrarkeppninnar

Undankeppni Stóru Upplestrarkeppninnar var haldin í dag á sal skólans.  Keppnin er árlegur viðburður í skólastarfinu og eru það 7.bekkingar sem taka þátt í keppninni eins og undanfarin ár.  Alls tóku 48 nemendur þátt að þessu sinni og greinilegt að nemendur hafa æft sig vel í vetur...
Að þessu sinni komust 
Úrslitakeppnin verður haldin þann 13. apríl nk. á sal skólans og eru foreldrar/forráðamenn hvattir til að mæta og fylgjast með börnunum sínum...

15.mars
Frábær árangur í stærðfræðikeppni Suðurnesja

Grindvískir nemendur náðu mjög góðum árangri í stærðfræðikeppni grunnskólanna á Suðurnesjum sem haldin var 23. febrúar síðastliðinn.  Alls tóku 148 nemendur af Suðurnesjum þátt í keppninni. 
Þegar úrslitin voru tilkynnt kom í ljós að Grunnskóli Grindavíkur sigurvegari keppninnar því nemendur skólans hirtu hvorki meira né minna 2 verðlaun af  9 sem í boði voru.  Enginn annar skóli var með jafnmarga nemendur í efstu flokkunum. Þess má geta að Aron Freyr Jóhannsson í 8.J og Óskar Pétursson 10.P enduðu í 2. sæti í sínum aldursflokki.

Skólinn sendi 23 nemanda í keppnina og árangurinn var eftirfarandi:
8. bekkur: 10 nemendur fóru í keppnina.  4 nemendur lentu í 1.-10. sæti,  4 í 11.-29. sæti og tveir í 50.-72. sæti
9. bekkur: 7 nemendur fóru í keppnina. 1 nemandi lenti í 1.-10. sæti, 5 í 11.-27.sæti og einn í 28.- 38. sæti.
10. bekkur: 6 nemendur fóru í keppnina.  4 nemendur lentu í 1.-12. sæti,  einn í 13.-27. sæti og 1 í 28.-38. sæti

Við getum verið stolt af þessum frábæra árangri og sýnir okkur að Grunnskóli Grindavíkur er svo sannarlega á réttri leið í þessum efnum eins og svo mörgum öðrum. 

Nemendur til hamingju með frábæran árangur!!

Bæjarstjórn Grindavíkur hefur ákveðið að leggja til fjármagn til viðbótar kennslustunda í samræmdum greinum í 10.bekk.  Umræður hafa farið fram á meðal nemenda annars vegar og foreldrahópsins hins vegar og eru allir á einu máli um að þessara tíma sé þörf.  Búið er að ákveða að hefja kennslu strax eftir páska. 
Kennt verður á  föstudögum kl. 14:00 – 17:00 og á laugardagsmorgnum kl. 09:00 – 12:00

Þan 17.febrúar skelltu nemendur unglingastigsins sér í betri fötin, tóku góða skapið með sér og lögðu af stað á dýrslega sýningu Verslunarskólans „Welcome to the jungle“  Nemendur skemmtu sér svo sannarlega vel á sýningunni.  Eins og síðustu ár voru þeir sjálfum sér og skólanum til mikils sóma.  Sjá nánar á myndasíðu skólans.

Undanfarnar vikur hafa nemendur frá 6.-10.bekkja tekið þátt í samkeppni um besta einkennismerki árshátíðar skólans nú í mars og söngleiksins Grease. S'olveig hlaut að launum bókargjöf fyrir hönnunina.   Hér tekur Sólveig við verðlaunum úr höndum Gunnlaugs skólastjóra. Til hamingju Sólveig!!!

Úrslitakeppni spurningakeppninnar hófst á mánudaginn var, þann 14.febrúar, er 9.P og 9.E kepptu á sal skólans.  Skemmst er frá því að segja að 9.P sigraði nokkuð örugglega með 34 stigum gegn 5.  Þá sigraði 10.P nemendur í 9.E með 38 stigum gegn 9.  Því var um hreinan úrslitaviðureign milli 10.P og 9.P.  10. bekkingar þurftu einungis jafntefli til að sigra í keppninni, en það blés á móti í byrjun því 9. bekkingar náðu forystunni og héldu henni mestan hluta keppninnar.  En 10.P seig fram úr á síðustu metrunum og sigraði nokkuð örugglega með 27 stigum gegn 20 við mikinn fögnuð samnemenda.  Til hamingju með sigurinn 10.P. Sjá myndasíðu frá keppninni -smelltu hér

Fimmtudaginn 17. febrúar verða nemendur boðaðir í viðtal ásamt foreldri/forráðamanni þar sem vitnisburður verður afhentur, farið yfir stöðu nemandans í náminu og annað sem kann að brenna á vörum manna.

Við annarskil voru foreldrar boðaðir í viðtöl og í framhaldi af þeim beðnir um að svara rafrænni könnun um viðhorf þeirra til  skólastarfsins sem og stjórnunar skólans, líðan og aðbúnaðar barna sinna o. fl.  Í þessum bekkjardeildum eru samtals 92 nemendur og svöruðu foreldrar/ foreldri  48 nemenda eða 52%. Við þökkum þeim sem sáu sér fært að mæta og taka þátt, kærlega fyrir. Nánari niðurstöður - smelltu hér

Gríðarleg fjölgun hefur orðið á innritun nýrra nemenda það sem af er skólaárinu.  Hvorki fleiri né færri en 48 nemendur hafa verið innritaðir frá skólabyrjun og um 12 hafa kvatt skólann okkar. Þetta gerir um 8% aukningu á heildarfjölda nemenda og miðað við þessar tölur kæmi engum á óvart þó fjöldinn kæmist yfir 500 á næstu misserum.

Samræmd próf í 4. og 7. bekk verða fimmtudaginn og föstudaginn 3.- 4.febrúar

4. bekkur  

• fimmtudagur 3. febrúar  Íslenska  kl. 9:30-12:00
• föstudagur 4. febrúar Stærðfræði kl. 9:30-12:00

7. bekkur  

• fimmtudagur 3. febrúar  Íslenska  kl. 9:30-12:00
• föstudagur 4. febrúar Stærðfræði kl. 9:30-12:00

18.jan
Skíðaferð á vegum Þrumunnar og skólans

Undirbúningur er hafinn að skíðaferð á vegum Þrumunnar og skólans . Um er að ræða dagsferð um helgi og auglýst er hér með eftir foreldrum til að sinna gæslu í ferðinni og jafnvel að taka þátt í
undirbúningi. Þeir sem hafa áhuga eða sjá sér fært geta haft samband við Ágústu í Þrumunni.

18.des
Litlu jólin hjá yngri nemendum

Þann 18. desember komu nemendur í skólann til að halda litlu jólin hátíðleg með kennurum og starfsfólki.  Margt var til gamans gert, m.a. gengið í kringum jólatréð og sungin jólalög.  Hjá þeim yngstu kom meira að segja jólasveinn í heimsókn og ræddi við börnin, söng með þeim.  Það vakti mikla kátínu meðal nemendanna sem fóru í stofurnar sínar með umsjónarkennara, hlustuðu á jólasögu, drukku gos og borðuðu góðgæti við kertaljós.  Auk þess skiptust nemendur á gjöfum sem.  Fleiri myndir eru á myndasíðunni. Smelltu hér.

17.des
Spuningakeppni unglingastigsins

Undankeppni spurningakeppni skólans var haldin síðasta skóladaginn fyrir jólafrí unglingadeildarinnar föstudaginn 17. desember. Þrjú eftirfarandi lið keppa til úrslita, 10.P, 9.E og 9.P. Spyrill í keppninni var Pálmi Ingólfsson og Ægir Viktorsson stigavörður.
Úrslitin urðu eftirfarandi:
10.P - 8.J =19-14
8.Æ- 9.E = 8-12
10.KM - 9.P = 20-21 
Fleiri myndir eru frá keppninni - smelltu hér

15.des
Nemendur syngja fyrir unga sem aldna

Þann 15.desember brugðu nemendur undir sig betri fætinum með flauelsraddir í farteskinu og héldu nokkrar stofnanir hér í Grindavík.  10. bekkingar fóru á öldrunarheimilið Víðihlíð,  9. bekkur á leikskólann Krók og 8. bekkur á leikskólann Laut.  Tilgangur ferðarinnar var að syngja nokkur jólalög, njóta stundar með þeim og létta lund þeirra sem þar voru. Fleiri myndir eru á skólasíðunni - smelltu hér

Mánudaginn 13. desember heimsótti hinn landsfrægi leikari, Felix Bergsson, nemendur á yngri stigum.  Hann las upp úr bókinni Augasteinn, kynnti nokkrar persónur á sinn einstæða hátt með leikrænum tilburðum. Að því loknu söng hann eitt jólalag og spjallaði við nemendur í stutta stund.  Það var greinilegt að hann náði vel til nemenda sem hlustuðu af mikilli athygli og ánægju.  Fleiri myndir eru frá heimsókninni -  smelltu hér

Jólaföndrið tókst með ágætum, mjög góð mæting og kökur frá foreldrum skiluðu sér mjög og vill Stjórn FGG þakka foreldrum fyrir það.  Stjórnin verður að biðjast afsökunar á því að margt af því föndri sem í boði var seldist upp en ástæðan fyrir því er að við fengum minna afhent en um var talað og er þetta bara eitthvað til að læra á.  Stjórnin vill þakka sérstaklega þeim sem komu til að aðstoða við jólaföndrið.  Fleiri myndir eru á myndasíðu skólans.

Vegna þeirrar röskunar sem orðið hefur á starfsáætlun skólans, hafa eftirfarandi breytingar verið gerðar:

Námsmat í 1.- 4. bekk fer fram í janúar 2005
Samræmd próf í 4. og 7. bekk fara fram 3. og 4. febrúar 2005
Samræmd próf í 10. bekk fara fram á tímabilinu 9. – 18. maí 2005
Vitnisburður í 1. - 7. bekk afhentur 27. janúar.

Ekki hefur verið tekin afstaða til þess af hálfu bæjaryfirvalda hvort þau leggi til að nemendum verði að einhverju leyti bættur sá tími sem þau misstu úr vegna verkfalls.

Nú um áramót lætur Halldór Ingvason félagsmálafulltrúi og skólafulltrúi Grindavíkurbæjar af störfum. Halldór hefur haft afskipti af málefnum skólans allt frá árinu 1962 og nær samfellt til dagsins í dag. Fyrst sem kennari við skólann, síðan yfirkennari og síðast skólafulltrúi bæjarins. Starfsfólk Grunnskólans færir Halldóri bestu þakkir fyrir samstarfið og þann stuðning sem hann ávallt sýndi skólastarfinu. Við viljum jafnframt bjóða nýráðinn skólafulltrúa Nökkva Má Jónsson velkominn til starfa.

Eldvarnarvika var vikuna 29. nóv – 3. des og af því tilefni fóru 3. bekkingar í heimsókn á slökkvistöðina til hans Ásmundar. Þar lærðu þau ýmislegt í tengslum við eldvarnir. Þau voru leyst út með gjöfum og þökkuðu þau kærlega fyrir sig. Meðfylgjandi mynd er tekin við það tækifæri.

Miðvikudaginn 24. nóvember fengu nemendur góðan gest heimsókn. Rithöfundurinn Draumey Aradóttir las upp úr verkum sínum og nemendur hlustuðu með miklum áhuga á hana lesa upp úr nýútkominni bók sinni „Birta“.  Draumey hefur verið búsett í Lundi í Svíþjóð frá árinu 1998 og skrapp hingað til lands í nokkra daga til að kynna nýútkomna bók sína.  Myndir frá heimsókninni er á myndasíðu skólans. smelltu hér

45 félagsmiðstöðvar sendu lið til þátttöku í þessari metnaðarfullu og glæsilegu keppni. Afrakstur dagsins var sýndur á sviðinu eftir um tveggja tíma vinnu þátttakenda. Um eittþúsund manns voru í húsinu þegar hvert listaverkið á fætur öðru steig inn í sviðsljósin og voru allir sammála um að sjaldan hefur keppnin verið glæsilegri.
Veitt voru 8 verðlaunasæti fyrir ýmsa flokka en okkar stúlkur lentu í 2. sæti í aðalflokki keppninnar um heildarútlitið,  þ.e. hár, hönnun, förðun og hvernig allt það tvinnaðist saman að mati dómnefndar. Þær slógu svo sannarlega í gegn og við óskum þeim til hamingju með árangurinn:
Eftirfarandi nemendur voru í hópnum: Gréta Halldórsdóttir 9.P, Elínborg Ingvarsdóttir 9.P, Stefanía Ósk Margeirsdóttir 8.J og Hrönn Árnadóttir 9.P

Framundan er hið árlega jólaföndur, Það hefur verið ákveðið laugardaginn 4. desember.  Eins og hefð er orðin fyrir mun FGG selja kaffi og kökuhlaðborð á jólaföndrinu til fjáröflunar og eru það foreldrar sem gefa kökurnar.  Ágóðanum af kökusölunni hefur verið ráðstafað á ýmsan hátt eins og t.d. kaupa á ritþjálfa, boltum og til að halda námskeið fyrir bekkjarfulltrúa svo eitthvað sé nefnt.  Sem sagt, sjáumst öll í jólaskapi á jólaföndrinu laugardaginn 4. desember kl. 13:00.

Það var svo sannarlega fjör er nemendur á unglingastigi lögðu undir sig eina álmu skólans föstudaginn 5. nóvember síðastliðinn.  Ástæðan var að þennan dag var haldin hönnunarkeppni á vegum Þrumunnar og skólans undir heitinu „Stíll 2004“  Ótrúlega skemmtilegar og frumlegar útfærslur litu dagsins ljós.  Sumir voru aðeins á stuttubuxum og líkami þeirra málaður frá toppi til táar í bresku fánalitunum, aðrir notuðu liti Ungmennafélagsins.  Skemmst er frá því að segja að hópurinn „Gula línan“ sigraði í keppninni og var fulltrúi Grindavíkur í úrslitakeppni félagsmiðstöðvanna sem haldin var í Íþróttahúsi Digranesskóla.  Þar stóðu þær sig frábærlega er þær náðu 2. sætinu hvað varðar heildarútlitið. 
Myndir komnar á myndasíðu frá hönnunarkeppninni - smelltu hér

Námsmati og vitnisburði á unglingastiginu sem vera átti í nóvember hefur verið frestað til 1.-6. desember. Vitnisburðardagur verður þriðjudaginn 14.desember.