2006-07

Nokkrir kennarar Fossvogsskóla komu, föstudaginn 11. maí síðastliðinn í heimsókn í skólann.  Megintilgangurinn með heimsókninni var að kynna sér nánar uppbyggingarstefnuna sem skólinn hefur verið að innleiða á undaförnum árum.  Þeir heimsóttu nokkra bekki, fengu innsýn inn í kennsluhætti á öllum aldursstigum og sáu með eigin augum hvernig uppbyggingarstefnan væri samofin öllu inntaki skólastarfsins.  Myndir frá heimsókninni má sjá á myndasíðu skólans.

Að samræmdu prófunum loknum nýttu nemendur 10. bekkja nokkra daga til að kynna sér starfsemi einstakra fyrirtækja og stofanna ásamt því leggja fram sinn skref í vinnuframlagi til þess sem þeir voru hjá. Nemendur fengu með þessu tækifæri til að takast á við og læra af eigin raun það sem fyrirtækið sérhæfði sig í.  Nokkrir nemendur ákváðu að nýta starfskynningardagana til að kynna sér starf skólaliða skólans. Þeir unnu við skúringar, frímínútnagæslu ofl. Hér má sjá myndir af þeim að störfum.

Grunnskóli Grindavíkur tók fyrir stuttu þátt í skólaþríþraut FRÍ í drengja og stúlknaflokkum og náði vægast sagt frábærum árangri.  Hvorki fleiri né færri en fimm stúlkur úr skólanum náðu að komast í úrslitakeppni sem haldin verður í Laugardalshöll sunnudaginn 20. maí nk.Til þess að komast í úrslit þurfti hver keppandi að ná því að vera meðal 16 efstu í sínum aldursflokki. Drengirnir náðu góðum árangri þó þeir náðu ekki að tryggja sér sæti í úrslitum þetta árið.  Til marks um þetta afrek má nefna að aðeins tveir skólar eru með fleiri keppendur í úrslitum. Samtals keppa um 64 einstaklingar á næstkomandi sunnudag.  Til hamingju með árangurinn og gangi ykkur vel.  Hér má fylgjast með keppninni á vef FRÍ. Smellið hér.
Eftirfarandi stúlkur keppa í úrslitakeppninni:

Sumardagurinn fyrsti. 
Að venju verður víðavangshlaup skólans á þeim degi. Skráning hefst kl. 10.30 og hlaupið kl. 11.00. Keppt verður í eftirfarandi flokkum: 1.- 4. bekkur, 5. - 7. bekkur og 8. - 10. bekkur.  Drengir hlaupa saman og stúlkur saman. Veittar verða viðurkenningar að hlaupi loknu til þeirra þriggja keppenda sem fyrstir verða í hverjum flokki. Sá bekkur sem verður með bestu þátttökuna í hlaupinu fær farandbikar til varðveislu í eitt ár.
Foreldrafélagið mun bjóða upp á prins póló ( 50 kr.) og svala ( 50 kr.) í tengslum við víðavangshlaupið. Jafnframt mun foreldrafélagið veita öllum þeim sem þátt taka í hlaupinu viðurkenningu fyrir þátttökuna.

Síðasti leikurinn í úrslitakeppninni var viðureign 9.P og 10.P.  Leikurinn var hnífjafn og æsispennandi allt fram til að síðustu spurningunni er staðan var 24-26.  Síðasta spurningin var gáta og 10.P svaraði fyrst en náði ekki réttu svari.  Við það fengu 9.bekkingar tækifæri til að jafna leikinn og um leið sigra í keppninni en svarið þeirra brást og 10.P fór því með sigur af hólmi 24-26.  Til hamingju með titilinn 10.P.  sjá nánar

Grindvískir nemendur náðu mjög góðum árangri í stærðfræðikeppni grunnskólanna á Suðurnesjum sem haldin var 27. febrúar síðastliðinn.  Alls tóku 126 nemendur af Suðurnesjum þátt í keppninni. 
Þegar úrslitin voru tilkynnt kom í ljós að Grunnskóli Grindavíkur án efa sigurvegari keppninnar því nemendur skólans hirtu hvorki meira né minna 2 verðlaun af  9 sem í boði voru og enginn annar skóli var með jafnmarga nemendur í efstu flokkunum. Þess má geta að Hjalti Magnússon í 9.E og Steinar Agnarsson 8.Æ sigruðu í sínum aldursflokki, Aron Freyr Jóhannsson í 10.KM endaði í 2. sæti í sínum aldursflokki og Sverrir Karl Björnsson 9.P endaði í 3. sæti.
Skólinn sendi 17 nemendur í keppnina og árangurinn var eftirfarandi:
8. bekkur: 5 nemendur fóru í keppnina.  1 nemendur lenti í 1. sæti,  2 lentu í 11.-29. sæti og tveir í 32.-42. sæti
9. bekkur: 6 nemendur fóru í keppnina. 4 nemendur lentu í 1.-10. sæti, 2 lentu í 11.-20.sæti.
10. bekkur: 6 nemendur fóru í keppnina.  4 nemendur lentu í 1.-12. sæti,  einn lenti í 13.-27. sæti og 1 í 28.-38. sæti

Við getum verið stolt af þessum frábæra árangri og sýnir okkur að Grunnskóli Grindavíkur er svo sannarlega á réttri leið í þessum efnum eins og svo mörgum öðrum. 
Nemendur til hamingju með frábæran árangur!!!

20.mars
„Gaman saman“

Þetta er yfirskrift á viðfangsefni sem kennarar á yngsta stigi vinna saman að þessa dagana. Markmiðið með því er að beina sjónum okkar allra í
skólasamfélaginu ( nemenda, starfsfólks og foreldra ) að jákvæðum og uppbyggilegum samskiptum barna á stiginu, veita þeim nemendum sem fara eftir þeim samskiptareglum sem við viljum sjá viðhafar á göngum, í matsal,í
frímínútum og í skólastofum athygli. Myndir af þessum nemendum eru hengdar upp á tveimur stöðum í skólanum undir yfirskriftinni GAMAN SAMAN !
Það gleymist oft í umfangi erfiðra agamála að lang-stærstur hluti nemenda á í jákvæðum og uppbyggilegum samskiptum við sína skólafélaga.
Að beina sjónum að því sem vel/rétt er gert getur verið liður í því að aðstoða þá sem geta gert betur, því það er aldrei svo að sá sem gerir mistök hafi ekki gert neitt rétt eða vel. 
Sem uppalendur þurfum við alltaf að hafa þetta að leiðarljósi og t.d. að loknum skóladegi að byrja að spyrja börnin hvað það var sem gekk vel, í hverju fannst þeim þau standa sig best og svo framvegis.  

Lokahátíð Stóru upplestrarkeppninnar fór fram í Gerðaskóla fimmtudaginn 22. mars.  Í þetta sinn var Grunnskóli Grindavíkur með lokahátíð með Gerðaskóla og Stóru – Vogaskóla en ekki er lengur leyfilegt að aðeins einn skóli standi að lokahátíð.  Lokahátíð næsta skólaárs verður haldin hér í skólanum.
Lesarar á lokahátíðinni voru 12, 4 frá hverjum skóla. Fulltrúar frá okkar skóla voru Telma Sif Reynisdóttir, Alexandra Marý Hauksdóttir, Kjartan Helgi Steinþórsson og Ingibjörg Yrsa Ellertsdóttir og stóðu þau sig öll frábærlega og getum við verið virkilega stolt af okkar fólki.  Gunnar Þorsteinsson lék Habanera á gítar í hléi. Í dómnefnd var einn úr hverjum skóla og síðan tveir dómarar frá Röddum, samtökum um vandaðan upplestur.  meira

Skólarnir í Grindavík hafa ákveðið að taka þátt í verkefninu Hjálparhendur fyrir elstu árgangana í leikskólanum og í 1.-3. bekk í grunnskólanum. Verkefninu er stjórnað af Upledger stofnuninni sem var stofnuð árið 1986 af Dr. John E. Upledger sem er einn af frumkvöðlum höfuðbeina- og spjaldhryggjarmeðferðarinnar. Útibú var stofnað á Íslandi árið 2004 og býður það upp á verkefnið Hjálparhendur í skólum og leikskólum um land allt. Grindavík er fyrsta bæjarfélagið sem ákveður að vinna verkefnið heildrænt, þ.e. að samræma vinnuaðferðir á skólastigunum tveimur og eru vonir bundnar við að jákvæð hegðun aukist til muna í kjölfarið.meira

Föstudaginn 2.mars síðastliðinn fengum við í heimsókn starfsfólks Grunnskólans í Þorlákshöfn.  Tilgangur ferðar þeirra var að fá innsýn inn í skólastarfið og kynna sér ýmsar nýjungar sem skólinn hefur verið að vinna að, sbr. Uppbyggingarstefnuna og kennsluhætti sem hafa verið innleiddir í skólastarfið.  Gunnlaugur tók á móti gestunum og að loknum veitingum og almennri tölu um starfsemina fengu kennarar að lítast um í kennslustofum og sjá nemendur við vinnu.  Að því loknum kynnti María Eir fyrir þeim hugmyndafræði, markmið og áhrif uppbyggingarstefnunnar á nám og samskipti innan skólans. Sjá myndir frá heimsókninni á myndasíðu skólans.

Miðvikudaginn 28.febrúar var undankeppni Stóru upplestrarkeppninnar haldin á Sal skólans.  Að þessu sinni verður Grunnskóli Grindavíkur með Gerðaskóla og Stóru-Vogaskóla á lokahátíð og verður hún haldin í Gerðaskóla fimmtudaginn 22.mars og sendum við þangað fjóra fulltrúa.  Þetta er í sjöunda skipti sem skólinn hér tekur þátt í þessari keppni en við hófum þátttöku árið 2000.  Þessir lesarar tóku þátt í undankeppninni að þessu sinni:  Alexandra Marý Hauksdóttir, Gunnar Þorsteinsson, Herta Pálmadóttir, Ingibjörg Yrsa Ellertsdóttir og Sunneva Jóhannsdóttir úr 7.F.  Hafþór Waldorff, Júlía Helga Jakobsdóttir, Lára Björk Ingibergsdóttir og Telma Sif Reynisdóttir úr 7.G. Frosti Grétarsson, Hilmar Örn Benediktsson, Kjartan Helgi Steinþórsson, Ríkharður Þór Guðfinnsson og Þyri Magnúsdóttir úr 7.P.

Allir þessir nemendur stóðu sig með stakri prýði en þeir sem stóðu sig best og verða fulltrúar skólans eru: Alexandra Marý, Ingibjörg Yrsa, Kjartan Helgi og Thelma Sif.

23.febrúar
Stakkavík færir skólanum veðurstöð að gjöf

Föstudaginn 23. febrúar færði útgerðarfélagið Stakkavík skólanum veðurstöð að gjöf.  Skólinn hefur á núverandi skólaári tekið þátt í Evrópsku samstarfsverkefni, Comenius, með skólum frá Noregi, Bretlandi, Ítalíu og Þýskalandi.  Samstarfsverkefnið ber heitið „Maths for fun“ eða „Stærðfræði fyrir alla“ og meginmarkmið skólans að vinna með stærðfræði úr umhverfinu.  Einn liður þess er að nemendur vinni með veðurfar, tölulegar rannsóknir og greiningar.  Þess vegna er það kærkomið að forsvarsmenn Stakkavíkur hafi sýnt þessu máli svo góðan skilning með þessari rausnarlegu gjöf.  Gunnlaugur Dan skólastjóri veitti gjöfinni viðtöku og þakkaði þann góða stuðning sem fyrirtækið sýndi í verki. 

Miðvikudaginn 21. febrúar síðastliðinn var öskudagur haldinn með sérstöku sniði hér í skólanum.  Nemendur á eldri stigum komu klæddir í búningum af öllum stærðum, gerðum og litum.  Þeir sem yngri voru, mættu í náttfötum.  Var haldið náttfataball fyrir yngsta stigið. Miðstigið skemmti með dansi á sal skólans.
Margir kennarar skólans létu ekki sitt eftir liggja (sérstaklega kennarar yngri nemenda)  og voru skrautlega klæddir.  Annars tala myndirnar sínu máli.

Tími: Þriðjudaginn 6. febrúar kl. 15:00 – 17:25
Staður:  Íslensk erfðagreining, Sturlugötu 8, Reykjavík

SAFT, Síminn, Microsoft, SMÁÍS og Samtónn boða til ráðstefnu um skynsama notkun og örugg samskipti á Netinu á Alþjóðlega netöryggisdaginn þann 6. febrúar nk.

Siðferði og Netið eru æ oftar nefnd í sömu andrá enda Netið síbreytilegur vettvangur sem við erum stöðugt að venjast og læra samfara auknum tengingum við aðra miðla. Rætt um að þeir umgengnishættir sem við höfum komið okkur saman um í hinu áþreifanlega umhverfi hafi ekki færst yfir á vettvang Netsins. Einnig er rætt um að netnotkun einstaklinga í skóla eða vinnu sé önnur en sú sem fer fram heima. Mikið vanti því á að við séum meðvituð um eðli Netsins og jákvæða jafnt sem neikvæða eiginleika þess. Þessi atriði verða meðal annars til umræðu á ráðstefnunni sem ætluð er öllum sem áhuga hafa á þessum málum. Sérstaklega höfðar hún til skólastjórnenda, kennara og kennaranema, foreldra, fjölmiðlafólks, höfundarétthafa og útgefenda, netþjónustuaðila og fulltrúa stjórnvalda og starfsfólks þeirra stofnana sem hafa með reglur um notkun upplýsingatækninnar að gera sjá nánar á vef SAFT.IS

Þá fer að líða að árlegu stærðfræðikeppni grunnskólanna.  Keppnin verður haldin í Fjölbrautaskóla Suðurnesja þriðjudaginn 27. febrúar kl 16:00 og verður hún með sama fyrirkomulagi og venjulega. Keppnin er fyrir 8., 9. og 10. bekk.

Föstudaginn 26. janúar var indíánadagur í 1. bekkjum skólans í tengslum við bókstafinn I.
Nemendur bjuggu til indíánahatta og hálsfestar og fengu stríðsmálningu í andlitið. Öllum hópnum var blandað saman og þeim síðan skipt niður í þrjá ættbálka, Sioux, Apalache og Navajo. Ættbálkarnir fóru á milli þriggja stöðva þar sem þeir dönsuðu regndans, léku sér í indíánaleik og fóru í göngutúr um skólann.
Indíánadagurinn tókst frábærlega í alla staði og var þetta góður endir á góðri viku í 1. bekk. Fleiri myndir eru á myndasíðunni.

Þriðjudaginn 9. janúar kl. 20.00 mun Spegillinn, félag aðstandenda átröskunarsjúklinga bjóða foreldrum upp á forvarnafyrirlestur í stofu 202 í  Grunnskóla Grindavíkur. Fyrirlesarar eru Margrét Gísladóttir geðhjúkrunarfræðingur og Kolbrún Marelsdóttir foreldri og varaformaður Spegilsins.  Þetta er athyglisverður fyrirlestur og eru foreldrar hvattir til að mæta!

Undankeppni spurningakeppni skólans var haldin síðasta skóladaginn fyrir jólafrí unglingadeildarinnar þriðjudaginn 19. desember. Þrjú eftirfarandi lið keppa til úrslita eftir áramót.  Þau eru 10.KM, 9.P og 10.P. Spyrill í keppninni var Pálmi Ingólfsson og stigavörður var Ægir Viktorsson. Keppninni verður haldið áfram á nýju ári.
Úrslitin urðu eftirfarandi:

10.KM - 9.E =19 -11
9.P- 8.Æ = 23 -12
10.P - 8.V = 12 - 11

Þann 13.desember brugðu nemendur 9. bekkja undir sig betri fætinum á leikskólann Krók.  Tilgangur ferðarinnar var að syngja nokkur jólalög, njóta stundar með þeim og létta lund þeirra sem þar voru. Fyrst dönsuðu þeir í kringum jólatréð, leiddu krakkana og sungu með þeim nokkur skemmtileg jólalög. meira

Föstudaginn á eftir, 15. des.  Gengu 10. bekkingar í Víðihlíð að heimsækja eldri borgara og njóta góðrar stundar með þeim.  Þar sungu nemendur fyrir þá eldri og þáðu síðan djús og piparkökur að söngnum loknum.  Hér má sjá myndir frá Víðihlíð.  Smelltu á þær til að stækka.

Mánudaginn 18. desember var á unglingastiginu, fjallað um einelti og áhrif þess á einstaklinginn.  Af því tilefni var gamall nemandi skólans fenginn til að halda fyrirlestur um málið og sagði hann frá sinni reynslu af málefninu.  Að fyrirlestrinum loknum fengu nemendur tækifæri til að spyrja þennan einstakling um hans reynslu og fleira sem málinu kom við.  Það þarf mikið hugrekki til að stíga fram fyrir skjöldu og viðurkenna einelti, hvort sem það er þolandi eða gerandi. meira

Þann 1. desember var brunavarnaæfing haldin í skólanum.  Nemendur og starfsfólk skólans ásamt slökkviliði og lögreglu tók þátt í þessari æfingu þar sem samhæfð var rýmingar- og björgunaráætlun sem miðast við hvað skuli gera er elds verði vart innan skólans.  Nokkrir nemendur voru fengnir til að leika það hlutverk að "týnast", vera slasaðir eða þurfa björgunar við.  Reykkafarar þurftur síðan að leita að þeim sem týndir voru.  Rýming á skólahúsnæðinu gekk vel og slökkvilið bæjarins sýndi góð viðbrögð. Myndir frá æfingunni er að finna á myndasíðu skólans.

Föstudaginn 17. nóvember skelltu nemendur og kennarar unglingastigsins sér í Borgarleikhúsið að sjá gamanleikinn Mein Kampf.  Nemendur fengu sérstaklega góðar móttökur við komuna í leikhúsið því þeim var boðið í skoðunarferð um húsnæðið til að kynnast starfseminni.  Að því loknu tylltu menn sér niður og horfðu á leikritið Mein Kampf með Berg Ingólfsson í aðalhlutverki. meira...

Dagur íslenskrar tungu er haldinn þann 16. nóvember hvert ár og á þeim degi taka nemendur sér fyrir hendur ýmislegt sem auðgað getur okkar mál.  Að þessu sinni var ákveðið að nemendur skyldu velja sér umfjöllunarefni tengdu íslenska málinu.  Fengu þeir nokkuð frjálsar hendur til þess og voru hvattir til að vera frumlegir í sínum verkum.  Einn dagur var tekinn frá í skólastarfinu til að finna sér efni til að vinna með (sem að vísu var viku frá fæðingardegi Jónasar Hallgrímssonar).  Síðan var samkeppni innan hvers bekkjar um það hverjir skyldu taka þátt í lokasýningu fyrir unglingastigið daginn eftir.  meira

Hin árlega undankeppni Stíls, hönnunar- förðunar- og hárgreiðslukeppni SAMFÉS fyrir 8. – 10. bekk fór fram á Sal Grunnskóla Grindavíkur föstudaginn 27. október og þema keppninnar var Móðir jörð.
Sex lið tóku þátt og hófst einnar stundar undirbúningur á keppnisdegi kl.12:00 á palli unglingadeildar. Þar gengu dómarar á milli keppenda, skoðuðu vinnubækur og fræddust um undirbúningstímabilið og vinnuferlið. Mjög strangar kröfur voru gerðar til þess að einungis keppendur kæmu einir að hönnun og allri vinnu á verkefnunum .
Keppnin í ár var hin glæsilegasta í alla staði og auðséð að liðin höfðu lagt mikla vinnu í verkefnin og voru áhorfendur fjölmargir eins og endranær.  Að þessu sinni stóðu Moldvörpurnar uppi sem sigurvegarar, en liðið skipuðu Helga Dís 10. P, Rakel Eva 9.E, Sóldís 10. P og Stefanía 10.P sem var módel hópsins. Vinningsliðið tekur þátt í keppni SAMFÉS í Kópavogi 18. nóvember 2006.   Myndir frá keppninni eru á myndasíðu skólans

Þann 20.október síðastliðinn varð skólinn þess heiðurs aðnjótandi að forseti Íslands hr. Ólafur Ragnar Grímsson heimsótti skólann ásamt föruneyti. Þessi óvænta heimsókn varð mikið gleðiefni fyrir nemendur og starfsfólk skólans. Forsetinn kynnti sér skólastarfið og heilsaði upp á nemendur í kennslustund og barnakór söng  Meðal gesta Forsetans í ferðinni var Roman Abramovich ríkisstjóri Chukotka og eigandi enska knattspyrnuliðsins Chelsea. Myndir frá heimsókninni eru á myndasíðu skólans.

Forvarnardagurinn 28. september 2006 beindist sérstaklega að 9. bekkjar nemendum í öllum grunnskólum landsins, fólst verkefnið hér í Grindavík í fræðslu, verkefnavinnu með fulltrúum ungmennafélagsins og útiveru með unglingadeildinni Hafbjörgu en foreldrafélagið sá sér ekki fært að taka þátt í deginum að þessu sinni.
Átakið var samstarfsverkefni Sambands íslenskra sveitarfélaga, Íþrótta- og Ólimpíusambands Íslands, Ungmennafélags Íslands, Bandalags íslenskra skáta, Reykjavíkurborgar, Háskóla Íslands, Háskólans í Reykjavík og forseta Íslands.
Byggir átakið á niðurstöðum rannsókna fræðimanna við HÍ og HR. Eins studdi lyfjafyrirtækið Actavís verkefnið í samræmi við stefnu þess að stuðla að heilbrigðum og hollum lífsháttum.

Nú hefur skólastarfið staðið yfir í u.þ.b. mánuð og nemendur brett upp ermarnar í náminu og sökkt sér í lærdóminn. Enda er fjölbreytt og skemmtileg vinna sem þeir inna af hendi þessa dagana sem og ætíð. 
1. bekkingar hafa verið til að mynda í umferðarþema, 2. bekkur að fjalla um árstíðirnar og að vinna með biblíuna ásamt fleiru.  Hér gefur að líta myndir frá þessum áhugasömu nemendum við störf og leik. Eins og sjá má skín ánægjan  úr andlitum þeirra.

Undanfarna daga hafa nemendur í 1. bekk verið læra um umferðina s.s. reglur og hættur sem að þeim steðja í umhverfinu.  Þau hafa kynnt sér leiðina í skólann frá heimilinu, gert umferðarljós,  farið í umferðarreglurnar og margt fleira.  Að þessu loknu fengu þau lögregluna í heimsókn til að spjalla við þau um umferðarreglurnar og þær hættur sem á vegi þeirra geta orðið.  Það er aldrei of varlega farið,   sérstaklega þegar skyggja tekur og gangandi vegfarendur eru ekki eins sýnilegir og í björtu.

Næstu vikur verða teknar bekkjarmyndir af nemendum til að setja á vefsíðu skólans.  Þessar myndir verða einnig vistaðar með stóru sniði svo að hægt verði fyrir þá sem vilja að prenta þær út í lit af vefsíðunni. Á morgun föstudaginn 22. sept. verða teknar myndir af nemendum 1.-4. bekkja.  Næstkomandi föstudag þann 29. sept. verða 5.-7. bekkir í myndatökum og að síðustu þann 6. október verða myndatökur fyrir 8.-10. bekkinga. Fleiri myndir eru á myndasíðu skólans

Líf og fjör hefur verið í 1.bekk undanfarið og börnin verið dugleg að aðlagast nýju umhverfi.  Í vikunni fékk 1.H lundapysju í heimsókn alla leið frá Vestmannaeyjum og vakti það mikla lukku. Fleiri myndir eru á myndasíðu skólans

Miðvikudaginn 20. september síðastliðinn ákváðu kennarar á unglingastiginu að nýta sér góða veðrið sem heilsaði okkur að morgni til að virkja nemendur í skemmtilegan ratleik um byggðina hér í kring. Nemendum á unglingastiginu var blandað milli árganga og myndaðir um 12 manna hópar sem áttu að leysa þrautir á tíma með því að svara verkefnum á hverri stöð  Að því loknu þurftu þau að finna út úr orðarugli í lestexta hvar næstu stöð væri að finna.  Alls voru þetta 7 stöðvar á víð og dreif um svæðið. Til að ýta undir samvinnu og samheldni þurfti hópurinn að halda í band allan tímann sem ratleikurinn tók.  Ef einhver sleppti bandinu var bætt 5 mínútum í hvert skipti við þann tíma sem tók að ljúka leiknum. Fleiri myndir eru á myndasíðu skólans

1. september
Leikjadagur yngstu nemendanna

Föstudaginn 1. sept. örkuðu nemendur og kennarar á yngsta stiginu út á rollutún, austan við tjaldstæðið, til þess að fara saman í leiki.  Þeir hittu svo sannarlega á rétta daginn til að halda leikjadaginn þar sem sól skein í heiði og hlýtt var í veðri.  Kennarar höfðu skipulagt daginn með það fyrir augum að nemendur gætu prófað sem flesta leiki sem í boði var.  Þeir skiptu svæðinu í leikjastöðvar þar sem margar krefjandi þrautirnar voru til að sigrast á.  Skemmtu allir sér konunglega og nutu sigranna sinna (hvort sem voru stórir eða smáir) því markmiðið var að nemendur gerðu sitt besta og kepptu við sjálfa sig. Velheppnaður dagur sem mun eflaust lifa í minningu margra þennan skólaveturinn.

Krakkarnir í 2. bekk hafa undanfarna daga verið að læra um árstíðirnar, þau skoðuðu meðal annars hvernig trén breytast eftir árstíðum og eins veðrið.  Í framhaldinu voru gerð veggspjöld þar sem hver árstíð og einkenni hennar komu fram.  Þau skoðuð líka í hvaða mánuði þau ættu afmæli og þá í hvaða árstíð sá mánuður var.  Nú ættu allir að vera margs vísari um árstíðirnar. Fleiri myndir eru á myndasíðu skólans