Lokaviðureign spurningakeppni miðstigsins fór fram í dag, föstudaginn 23. apríl. Mikil spenna var í loftinu og áhorfendur skiptust í tvo hópa og héldu stíft með sínu liði. Liðin sem leiddu saman hesta sínu voru 7.S og 5.P. Í liði 7.S voru Kristín Ragnheiður Eiríksdóttir, Margrét Rut Reynisdóttir og Valgerður Þorsteinsdóttir en í liði 5.P voru Haukur Arnórsson, Inga Bjarney Óladóttir og Nökkvi Már Nökkvason. 7.S stóð uppi sem sigurvegari að lokum og fékk bókina Örlög guðanna í viðurkenningarskyni. Auk þess verður nafn bekkjarins skráð á skjöld sem geymdur verður í stofunni hjá sigurliðinu í eitt ár. Eins og áður hefur komið fram er þessi spurningakeppni að danskri fyrirmynd og er markmiðið að örva nemendur til þess að lesa meira. Þessi tilraun tókst afar vel og þegar ákveðið að gera spurningakeppni úr bókum að árvissum þætti í starfi miðstigsins en hafa keppnina á haustönninni og láta nemendur vita um það, hvaða höfundar verða í pottinum, áður en þeir fara í sumarfrí.